Adecco senta massiv las consequenzas da la pandemia en las cifras per il prim quartal 2020. Il concern internaziunal cun sedia en Svizra registrescha ina svieuta da bun 5,4 milliardas francs. Quai è in minus da 9% per ils emprims 3 mais da quest onn, communitgescha Adecco. Surtut il mars engrevgeschia las cifras: las mesiras cunter ils coronavirus da plirs stadis hajan laschà crudar la dumonda per servetschs da persunal.
Sperdita cun scriver giu 381 milliuns pervi da Covid-19
Quai ha era effect sin il gudogn brut ch'è sa reducì per 8% sin radund ina milliarda francs, ed il gudogn operativ (avant tschains, taglia ed amortisaziuns) è crudà per 38% sin 143 milliuns francs. La raschun per la sperdita brutta da 366 milliuns francs è però il fatg che Adecco scriva giu anticipadamain 381 milliuns francs - tenor atgnas indicaziuns pervia da l'avegnir malguess en connex cun Covid-19. E quai surtut en Svizra, la Germania e l'Austria.
Ins quinta cun segund quartal difficil
Per il segund quartal è Adecco pauc optimistic: L'avrigl saja la svieuta crudada per 40%, uschia ch'il quartal vegnia plitost difficil. Quai schegea ch'ins vesia ensainas per ina stabilisaziun - quai surtut en ils stadis ch'hajan prendì baud mesiras per in uschènumnà «lockdown». Adecco ch'è quotà a la bursa punctuescha però che la gruppa haja ina ferma bilantscha ed avunda liquiditad.