Il Cussegl federal na vul vinavant betg suttascriver e ratifitgar la cunvegna da las Naziuns Unidas davart il scumond d'armas atomaras. Tenor el è la via che la Svizra va actualmain la meglra. La Svizra sa participescha ad in'autra cunvegna internaziunala che reglescha il diever d'armas nuclearas e la discharmaziun da quellas sco er il diever paschaivel da l'energia nucleara.
Ina participaziun al contract da l'ONU na saja perquai betg en l'interess da la Svizra, ha communitgà il Cussegl federal. I dettia pliras raschuns pertge ch'ina midada dal sistem na mainia betg a la finamira:
- Cun la nova guerra en l'Europa – la guerra tranter la Russia e l'Ucraina – sajan aspects da la politica da segirtad puspè vegnids pli impurtants.
- Il Cussegl federal ha dubis tge che quest contract porta la finala.
Ils pajais che possedan armas atomaras e bunamain tut ils pajais dal vest na sustegnan numnadamain betg la cunvegna. Era la Nato, l'Organisaziun dal pact da l'Atlantic dal Nord, na renconuscha betg la cunvegna da las Naziuns Unidas.
In mund senza armas nuclearas possian ins però be cuntanscher cun ils pajais che possedan armas atomaras e betg cun esser cunter quels, uschia il Cussegl federal plinavant.
La Svizra vegnia entant vinavant a pretender ch'ils pajais pertutgads resguardian lur obligaziuns da discharmaziun.