Il termin da referendum cunter l'iniziativa «pedofils na duain betg pli pudair lavurar cun uffants» è scrudà ils 5 da fanadur 2018. La dretgira sto cun quella lescha ordinar en mintga cas in scumond da lavurar cun uffants per vita duranta. Quai en cas che creschids vegnan sentenziads pervi d'in delict sexual cun minorens u autras persunas spezialmain avisadas sin agid – e quai independentamain da l'autezza dal chasti. Persunas spezialmain avisadas sin agid èn persunas ch'èn avisadas sin agid, pervi da lur vegliadetgna u ina malsogna sco era persunas dependentas dal delinquent, u betg ablas da sa dustar u da decider.
Excepziun per amur da giuventetgna
La lescha resguarda dentant er il principi da commensurabladad. Perquai è previs in'excepziun per amur da giuventetgna. Uschia po la dretgira desister sin il scumond da lavurar cun uffants per vita duranta, sch'i n'è betg qua il privel ch'i capita anc ina giada. Quai vala en spezial per l'amur da giuventetgna. Tar delinquents pedofils en il senn da la psicologia n'èn previsas naginas excepziuns. Per quels cas sto la dretgira dar ora il scumond.
Dus instruments per realisar scumond
Per realisar il scumond datti dus instruments. Cun in extract dal register penal e dal register privat spezial pon patruns, organisaziuns ed autoritads controllar sch'i dat in scumond per in collavuratur u ina collavuratura. Plinavant pon quels delinquents vegnir controllads da l'assistenza a condemnads cun chasti cundiziunal.
RR novitads 12:00