Dapi il 2009 hajan ins proclamà raudund 30 scumonds da professiun, er sin stgalim dal top-management. Questas sacziuns muntian facticamain la fin d'ina carriera sco manager sin il sectur da finanzas, uschia Branson envers las gasettas da la dumengia. Ils ultims onns saja la Finma vegnida pli activa e prospectiva en quest areguard.
Er en autras terras vegnan banchiers corrupts chastiads, là dentant plitost cun multas fitg autas fin en las milliardas enstagl da scumonds da professiun. El na craja dentant betg che l'autezza da la multa saja decisiva, uschia Mark Branson. Malgrà multas autas, haja dà ulteriurs surpassaments da la lescha.
En Svizra dastga la Finma en cas da surpassaments trair en il gudogn d'ina banca, limitar il champ da fatschenta ubain prender davent la licenza da banca. La banca privata tessinaisa BSI ha pers la licenza perquai ch'ella è stada involvida en il scandal enturn il fondo dal stadi malaisic 1MDB.
RR novitads 11:00