La Svizra dastga puspè trametter enavos en l'Italia famiglias cun uffants che tschertgan asil en il rom da las reglas da Dublin. Quai ha decidì il Tribunal administrativ federal en ina sentenzia directiva e mida uschia sia pratica valaivla dapi dus onns.
«Decret da Salvini» betg adequat per persunas che basegnan protecziun
Il 2019 aveva il medem tribunal decidì da betg trametter enavos requirents d'asil en l'Italia. Cun l'uschenumnà «decret da Salvini» era quai previs dar suttetg a requirents d'asil mo en centers per l'emprima registraziun u en centers temporars, sch'els turnavan en l'Italia, perquai ch'in auter stadi aveva refusà els sin basa da la cunvegna da Dublin. Centers per la segunda registraziun na stevan betg a disposiziun a persunas tramessas enavos en l'Italia – centers cun meglieras cundiziuns. Centers per l'emprima registraziun u era temporars na sajan betg acceptabels per famiglias cun uffants minorens u era autras persunas ch'han basegn da protecziun.
Refusà il terz recurs da mamma e figl encunter il SEM
Las directivas dal «decret da Salvini» sajan ussa annulladas per la pli gronda part, uschia ch'il sistem da recepziun ed integraziun saja puspè avert per tuts requirents d'asil. Persunas cun basegn da protecziun survegnian uschia puspè il sustegn necessari. Concret ha il Tribunal administrativ federal decidì ch'il Secretariat da stadi per migraziun (SEM) dastga trametter enavos en l'Italia ina dunna ch'educhescha suletta e ch'aveva dumandà per asil. Dus ulteriurs recurs da la mamma cun ses figl aveva il Tribunal administrativ federal anc approvà pli baud cun sa refereir sin il «decret da Salvini». Recurs cunter il Sem che vuleva trametter enavos en l'Italia els sin basa da la cunvegna da Dublin.