La vaccinaziun saja in criteri per vegni emploià, citescha la gasetta ina pledadra dal departament da sanadad tessinais. I na vegnia betg pli engaschà novs collavuraturs che na sajan betg immunisads. Tenor la «NZZ am Sonntag» è il Tessin cunquai l'emprim chantun che vul be pli engaschà persunal vaccinà.
La gasetta presuma, ch'il chantun Tessin vul prevegnir a candidaturas da persunas betg vaccinadas da l'Italia. Là vala numnadamain in obligatori da vaccinaziun en il sectur da sanadad. A partir dal mars vala er uschè in obligatori en Germania. Tenor ina enquista tar differents ospitals, n'hai dentant betg dà dapli candidaturas.