Actualmain tramettan cybercriminals e-mails che vesan ora sco els fissan da l'AGOV. Quai è il login che Svizras e Svizzers pon nizzegiar dapi l'entschatta dal 2024 per vegnir en contact cun autoritads da la Confederaziun, dals chantuns e da vischnancas. Per exempel per emplenir electronicamain la decleraziun da taglia. Actualmain survegn l'Uffizi federal per segirtad da cyber BACS bleras annunzias davart tals e-mails abusivs. En l'e-mail vegnan las persunas supplitgadas da chargiar giu in pachet da software. I vegn tranter auter pretendì che l'AGOV access saja disponibla sco applicaziun da desktop. Quai che na constat betg, l'app AGOV access è disponibla mo per smartphones.
Quests e-mails abusivs cuntegnan in link per la maschina da retschertga «Bing» da Microsoft. Sch'ins clichescha lura sin quest link, vegnan ins sin in'ulteriura pagina d'internet che porscha in pachet da software per MacOS dad Apple. Sch'ins chargia lura giu la datoteca ed installescha quella, vegn il computer infectà cun ina software nuschaivla cun il num «Poseidon Stealer». Ed ina giada che quella software nuschaivla è installada sin l'apparat, engola ella diversas infurmaziuns dal computer da l'unfrenda e trametta quella als cybercriminals.
Ensemen cun partenaris ha l'uffizi federal instradà mesiras da defensiun per mitigiar las smanatschas. L'uffizi recumonda da stizzar immediatamain quest e-mail abusiv. A las applitgadras ed als applitgaders che han chargià giu ed installà la malware, recumonda l'uffizi dad immediatamain installar danovamain dal tut l'apparat pertutgà. Per expertas ed experts da segirezza da cyber stattan a disposiziun ulteriuras infurmaziuns tecnicas ed indicaturs (Indicators of compromise» – IOCs) che pon vegnir consultads sin la pagina Github dal GovCERT.