5,3 milliuns persunas svizras han tadlà il davos mez onn regularmain radio. Quai è in zic damain ch'il medem semester da l'onn avant. Quellas ch'han taidlà han dentant tadlà pli ditg numnadamain 112 minutas a di enstagl da 109 minutas. Quai demussa in studi da la fundaziun «Mediapulse».
Concret han l'ultim mez onn 72% da las persunas en Svizra sur 15 onns tadlà radio, quai ch'è 3% pli pauc che la medema perioda dal 2022, sco ch'ina analisa da las datas da la fundaziun Mediapulse mussa.
Differenzas tranter regiuns linguisticas
I dat dentant grondas differenzas tranter las regiuns linguisticas. Uschia cuntanscha il radio en il Tessin passa 77% da las persunas sur 15 onns, entant ch’en la Svizra tudestga èn quai 73% ed en la Romandia mo 69%.
SRG SSR vinavant dominant
Tranter ils emetturs da radio han dominà en tut las trais regiuns linguisticas sco ils onns avant, ils emetturs da la SRG SSR: durant la perioda da rapport avevan quels en la Svizra tudestga ina part dal martgà da radund 57%. Per cumparegliar: il segund mez onn dal 2019 aveva la SRG SSR anc ina part dal martgà da bun 60%.
L'emettur privat che vegn tadlà il pli savens en la Svizra tudestga è restà il radio lucernais Pilatus, suandà dal radio Central e dal radio Argovia. Tuts trais tutgan tar CH Media.
Per l’analisa ha Mediapulse intercurrì l’utilisaziun da 8'860 persunas. Betg resguardads èn vegnids quels che taidlan radio linear cun uregliers, sco er l’utilisaziun da podcast da radio.