Siglir tar il cuntegn

Header

cuntegn

Svizra Sensaziun verda a Turitg

Cun Martin Neukomm dumogna in represchentant giuven dals Verds il sigl en la regenza dal chantun Turitg. La PLD perda in sez en la regenza. En il parlament pon schebain ils Verds sco er ils Verdliberals augmentar fermamain lur preschientscha. Gronda perdidra è la PBD.

Il plitost nunenconuschent cusseglier chantunal da 32 onns, Martin Neukomm (Verds), ha cuntanschì cun 121'823 vuschs in dals set sezs en la regenza dal chantun Turitg. El ha fatg il sisavel plaz, suenter ils cussegliers guvernativs da fin uss ed ha uschia pudì gudagnar enavos il sez ch'ils Verds avevan pers avant quatter onns.

Sco segunda nova cussegliera guvernativa è vegnida elegida Natalie Rickli cun 116'096 vuschs. Ella ha pudì defender il segund sez da la PPS. Cun l'elecziun da Rickli ha la regenza Turitgaisa uss ina maioritad da dunnas.

Il candidat da la PLD, Thomas Vogel, ha bain cuntanschì cun 109'624 vuschs la maioritad absoluta, è dentant crudà ora sco 8avel. La PLD perda uschia ses segund sez en la regenza.

Elegids èn:

  • Mario Fehr, PS
  • Jacqueline Fehr, PS
  • Ernst Stocker, PPS
  • Silvia Steiner, PCD
  • Carmen Walker Späh, PLD
  • Martin Nuekomm, Verds
  • Natalie Rickli, PPS

Verds e Verdliberals èn ils victurs

Ils Verds ed ils Verdliberals gudognan las elecziuns parlamentaras en il chantun Turitg. Omaduas partidas gudognan vitiers 9 sezs. Da nov han ils Verdliberals 23 mandats ed ils Verds 22 en il parlament che dumbra 180 sezs.

Gronda perdidra è la PBD che perda ses 5 sezs e n'è betg pli represchentada en il parlament. Er la PPS sto laschar plimas. Ella perda 9 sezs, ha dentant cun ses 45 sezs anc adina la pli gronda fracziun. La PLD perda in sez e vegn anc sin 29 mandats. Mintgamai in sez perdan PS e PCD. Cun 35 sezs restan ils Socialdemocrats dentant anc la segund-ferma fracziun en il parlament. La PCD vegn anc sin 8 sezs.

RR novitads 18:00

Artitgels legids il pli savens