Tar ordinaziuns dal Cussegl federal duai il Cussegl naziunal survegnir in dretg da veto. La Chombra gronda ha approvà il mardi ina midada da lescha correspundenta. Il veto cunter ordinaziuns duai evitar tenor ils aderents ch'il Cussegl federal decida ordinaziuns che na correspundan betg a la voluntad dal parlament.
Violenza da la separaziun da las pussanzas
Tant il Cussegl federal sco era ils chantuns èn cunter in tal dretg da veto. Ord vista dal Cussegl federal, vegniss uschia violada la separaziun da las pussanzas. Ordinaziuns regleschan numnadamain ils detagls da la realisaziun d'ina lescha. Fertant ch'il parlament relascha las leschas, è il Cussegl federal tenor constituziun responsabel per las ordinaziuns.
Instradà la midada da lescha aveva Thomas Aeschi da la PPS da Zug cun ina iniziativa parlamentara. Sper la PPS èn er la maioritad da las fracziuns da la PLD e PCD sco er la PVL e la PBD s'exprimids per il dretg da veto. Cunter l'iniziativa parlamentara eran sulet la PS e la Verda sco er il Cussegl federal. Refusà in tal instrument han er ils chantuns.
RR novitads 11:00