Siglir tar il cuntegn

Header

Navigaziun

Legenda: Tadlar il audio Saira: Midar dal militar en servetsch civil duai vegnir pli grev. Durada 03:22 minutas.
Or da Actualitad dals 20.02.2019.
cuntegn

Svizra Servetsch civil duai daventar main attractiv

Il Cussegl federal vul dapli schuldada e perquai duai vegnir pli difficil da midar da l'armada tar il servetsch civil.

Damain persunas duain far servetsch civil, quai vul il Cussegl federal. Quel vul numnadamain evitar che l'armada perda schuldada, ha declerà Guy Parmelin.

Sper las mesiras ch’el ha gia tramess en consultaziun, preschenta el al parlament in’ulteriura mesira: En l’avegnir na duaja betg pli esser pussaivel da far servetsch civil en l’exteriur. Uschia vul il Cussegl federal impedir ch’il servetsch civil vegnia privilegià envers il servetsch militar.

El argumentescha las mesiras cun il dumber da persunas che prestian servetsch civil che s’augmentia constantamain. Organisaziuns sco la Gruppa per ina Svizra senz'armada (GSoA) e l'uniun dal servetsch civil svizzer CIVIVA èn cunter ils midaments planisads ed han annunzià ch'ellas fetschian in referendum sche quels midaments vegnan tras il parlament. Las partidas da la sanestra na sustegnan era betg la proposta dal Cussegl federal.

Sch’ins dat in sguard sin las cifras èsi da vesair ch'i dat adina da pliras persunas che fan servetsch civil empè da servetsch militar. Entant che passa 4'600 persunas han fatg il 2011 servetsch civil, eran quai il 2017 passa 6'700. Be il 2018 è la cifra sa reducida lev. Però il 2019 mussia cha la cifra crescha gia puspè, uschia Guy Parmelin.

RR actualitad 17:00