13 examinaziuns hajan els fatg l’onn passà, ha ditg Thomas Fritschi, il schef da l’autoritad da surveglianza independenta. En general lavuria il servetsch secret da la Confederaziun en il rom dals cunfins legals, a moda effectiva ed adequata.
Potenzial per meglierament
Malgrà quai dettia potenzial per meglierament. Perquai hajan els era fatg 32 recumandaziuns e 30 remartgas per mauns dal schef dal VBS. Cusseglier federal Guy Parmelin, ch’era l’onn passà anc a la testa dal departament, haja acceptà tut quellas ed era instradà che quellas vegnian realisadas, ha Fritschi ditg cun cuntentientscha a chaschun da la preschentaziun da l’emprim rapport da l’autoritad da surveglianza independenta.
Dapi l’atun 2017 dastga il servetsch secret installar minispiuns en localitads, leger dascusamain ils e-mails e tadlar ils discurs da telefon da persunas suspectadas. Per tut quellas mesiras dovri dentant ina lubientscha dad ina dretgira.
RR novitads 17:00