Siglir tar il cuntegn

Header

cuntegn

«Service citoyen» Iniziativa per in servetsch da burgais

Ils servetschs militars e civils na correspundan betg pli als basegns d'ozendi, pretenda in comité e lantscha in'iniziativa dal pievel.

Da nov duai mintga persuna en Svizra prestar ina giada durant sia vita in servetsch da burgais a favur da la publicitad e da l'ambient. Questa pretensiun vul in comité fixar en la Constituziun federala e rimna uss suttascripziuns.

L'idea è da cumplettar il sistem actual da servetsch militar e civil: tgi che na po betg far militar ozendi, fa servetschs tar la protecziun civila, e tgi che na vul betg prestar servetsch militar, po era far servetsch civil. Il nov servetsch da burgais duain dentant tut las persunas en Svizra prestar – umens e dunnas. E tgi che na po betg far quest servetsch duai stuair pajar ina taxa.

Part dal comité d'iniziativa fan sis parlamentaris federals da pliras partidas (PS, PLD, PVL, AdC e Verds). La crisa da Covid-19 e la situaziun cun ils fugitivs da l'Ucraina mussia, che la Svizra stoppia esser pronta per las pli differentas situaziuns, argumentescha il comité sia idea per in tal «Service Citoyen».

Mancanza da persunal

Actualmain examinescha la Confederziun in obligatori da militar era per dunnas. L'armada e la protecziun civila han numnadamain memia pauca glieud e quest problem vegn anc mender: fin la fin dal decenni ha la Svizra difficultads da tegnair l'armada sin 140'000 persunas. Era il Cussegl federal ha gia ponderà in servetsch da burgais – ha dentant puspè laschar crudar l'idea.

audio
Per tadlar: curt e cumpact
ord RTR Audio dals 26.04.2022.
laschar ir. Durada: 1 minuta 14 Secundas.

RTR novitads 11:00

Artitgels legids il pli savens