Sut tetg è la gulivaziun da finanzas: Bain survegnan ils chantuns pli povers (e cunquai era il chantun Grischun) pli paucs daners per la perioda 2016-2019 – il parlament ha dentant chattà in cumpromiss per betg reducir uschè fitg las contribuziuns. Il chantun Grischun survegn tenor la Cussegliera guvernativa, Barbara Janom Steiner 7-8 milliuns pli pauc e quai saja supportabel.
In auter grond tema che ha fatschentà omaduas chombras: Quant fitg dastga il stadi tadlar giu telefons u survegliar computers per observar persunas u organisaziuns criminalas?
Per sclerir quella dumonda ha il parlament deliberà gist duas leschas: Las reglas per survegliar la telecommunicaziun (BÜPF) e dapli cumpetenzas per il servetsch secret.
Dumondas restan tar armada ed asil
Il Cussegl dals chantuns ha approvà la refurma d’asil cun pitschnas midadas. L’idea da la Cussegliera federala Simonetta Sommaruga da far proceduras d’asil pli spertas ed effizientas ha chattà bun resun en il parlament. Il Cussegl naziunal sto anc tractar il project.
Suenter ch’ina allianza nun-sontga da PPS, PS e Verds ha laschà far naufragi la refurma da l’armada en il Cussegl naziunal, vegn quella anc ina giada sin maisa – sco emprim tar il Cussegl dals chantuns. L’idea dal Cusseglier federal Ueli Maurer è d’avair en l’avegnir in’armada pli pitschna e pli flexibla – dentant bain scolada ed equipada.