Il Cussegl dals chantuns na vul, almain per il mument, betg distgargiar la populaziun pervi dals pretschs pli auts d'energia, sco per benzin e diesel. El ha refusà quatter moziuns da la PPS en quest connex. Gievgia ha lura er il Cussegl dals chantuns ditg Na ad ina reducziun dals pretschs da carburant.
L'attatga da la Russia sin l'Ucraina e las sancziuns e cuntrasancziuns han segiramain augmentà la tensiun sin il martgà. I dat dentant anc in'autra raschun per ils pretschs auts. E quai è la situaziun dals producents. Tenor Avenergy, la federaziun svizra dals importuns da carburant ed ieli da stgaudar, hajan bleras raffinarias reducì u mess ord funcziun lur producziun durant la pandemia. Ed ussa manchian quellas capacitads e quai mainia ad ina stgarsezza sin il martgà. Pli pauc ch'i dat dad in product che vegn dumandads e pli char che quel vegn. Vitiers vegnia che las reservas sajan bassas ed uschia creschia il pretsch da benzin e da l’ieli da stgaudar era pli fitg ch'il pretsch d'ieli brut.
Sessiun extraordinaria
La PPS ha schizunt pretendì ina sessiun extraordinaria. Ella ha inoltrà quatter moziuns. Tuttas pretendan mesiras dal Cussegl federal per distgargiar la populaziun. Quai en emprima lingia cun sbassar las taglias e las taxas sin il benzin e l'ieli da stgaudar. Tar il benzin fan quellas ora tranter 80 e 90 raps per liter.
La pli gronda part vegn puspè investida en l'infrastructura da traffic, per exempel en la construcziun u il mantegniment da las vias. La PPS pretenda ussa da sbassar quellas taglias e taxas per 50%. Actualmain muntass quai ch'ins stuess pajar 40 raps pli pauc al tancadi per in liter benzin.
Tschellas partidas èn scepticas
Ch'ils pretschs auts èn in problem e strapatschan il budget da las Svizras ed ils Svizzers è era per tschellas partidas clar. Tschellas partidas burgaisas vulan dentant in program pli cumplessiv, che n’è betg mo focusà sin il pretsch da benzin e dad ieli da stgaudar. Il Cussegl federal duai preschentar in program da distgargia. Lez ha gia instradà ina task force ch’examinescha tge pussaivladads ch'i dess. En in'autra direcziun va la sanestra. Ella disturba en emprima lingia il fatg ch'ils plans da la PPS ed era da tschellas partidas burgaisas prevesan ina reducziun da la taglia per tuts.
La partida socialdemocratica ensemen cun ils verds ed ils verd liberals sa dostan cunter quai principi da sprizza, da reparter egualmain sin tuts ils respargns. Bunamain 1/4 da las chasadas posseda gnanc in auto, di l’Uffizi federal da statistica. Ellas prefereschan perquai in sustegn precis per persunas e famiglias cun entradas bassas. In'idea dals socialdemocrats è per exempel ina sort «Check federal», ch'i vegn dà directamain daners a la populaziun. Dentant cun excepziuns. Betg profitar da quels daners duain famiglias e persunas che fladegian bler.