Er en l'avegnir vul la Svizra pudair limitar il dumber da medias e medis. Da nov vala in stop da medis nunlimità. Omaduas chombras parlamentaras han approvà la proposta da la conferenza d'intermediaziun. I manca anc la votaziun finala.
Ils chantuns pon refusar il permis a medis novs sch'i dat en ina sparta specifica memia blers medis. Uschia vul'ins franar ils custs da sanadad. L'uschenumnà stop da medis exista dapi radund 20 onns. Fin uss era quel adina limità ed è vegnì prolungà pliras giadas.
