Siglir tar il cuntegn

Header

audio
Sessiun extraordinaria: Dapli temp per pajar enavos credits
Or da Actualitad dals 05.05.2020.
laschar ir. Durada: 02:36 minutas.
cuntegn

sessiun extraordinaria Pajar enavos credits da corona

Entant ch'il Cussegl naziunal vul midar las reglas per pajar enavos ils credits da corona, na vul quai il Cussegl dals chantuns betg. Dentant sa spartan las opiniuns er en il Cussegl dals chantuns.

Ueli Maurer n'è betg intgantà da l'idea da prolungar il temp per pajar enavos ils credits. Il minister da finanzas survegn sustegn dal cusseglier dals chantuns grischun Martin Schmid.

Igl è anc massa baud per midar las reglas.
Autur: Martin SchmidCusseglier dals chantuns PLD/GR

Uss saja quai impurtant ch'ins possia gidar là nua ch'i saja acut. Sco proxim stoppian ins avair ina survista da tut per pudair decider co vinavant. Dentant quai vul anc temp. Quai stoppian ins far pli tard, cura ch'ins sappia tgi che vegnia da pajar cura. Ma Schmid dubita ch'ina interpresa che na vegnia betg da pajar enavos il credit suenter 5 onns, vegnia lura da far quai suenter otg onns.

Auter vesa quai il segund cusseglier dals chantuns grischun Stefan Engler. Uss haja la Confederaziun dà ils raps sco agid. Dentant possia ir anc ditg enfin ch'ils affars vegnian ord la crisa da corona. Perquai pudess dapli temp per pajar enavos ils credit dar dapli segirtad als affars per planisar.

En sasez fissi ideal sch'ins sto pir pajar enavos ils credits, cura ch'ins scriva cifras nairas cun l'affar.
Autur: Stefan EnglerCusseglier dals chantuns PCD/GR

Fin oz èn vegnids surdads 140'000 credits per 19 milliardas francs. La Confederaziun fa dentant quint ch'i vegnan dà ora anc daplirs credits. Quai enturn 200'000. A disposiziun stattan 40 milliardas francs per ils credits.

RTR actualitad 12:00

Artitgels legids il pli savens

Ir a sanester Ir a dretg