En l'avegnir duain persunas ch'èn pertutgadas da rapports da medias betg giavischads, pudair impedir la publicaziun da quels rapports pli simpel. Quai vul uss era il Cussegl naziunal. Tanscher duai gia in «grev dischavantag» per ordinar ina mesira preventiva, e betg sco previs dal Cussegl federal, in «spezial grev dischavantag». La nova proposta va ussa enavos al Cussegl dals chantuns. Quella vul tranter auter era cuntanscher, che privats ed interpresas hajan access pli simpel tar dretgiras.
Cun 183 cunter 1 vusch e duas abstenziuns ha il Cussegl naziunal approvà mardi la revisiun dal cudesch da procedura civila svizzer. La procedura civila stoppia esser favuraivla per laics, ha ditg Philipp Matthias Bregy (center/VS).
Problematic per la libertad da la pressa
Ina gronda allianza da medias avertescha che la libertad da la pressa saja en privel en Svizra. Ella pretenda dal Cussegl naziunal da renunziar d'ina part da la revisiun dal cudesch da procedura civila che prevesa mesiras cunter las medias.
Concret vai per l'artitgel che definescha sut tge circumstanzas ina dretgira dastga scumandar a moda superprovisorica la publicaziun dad in artitgel u dad ina contribuziun da radio u da televisiun. Tenor l'allianza che sa cumpona tranter auter da la SSR, dal Cussegl svizzer da la pressa e dals pli impurtants sindicats da medias da la Svizra, avess la midada per consequenza che retschertgas e rapports critics e malvesids pudessan vegnir bloccads pli lev. Quai saja fitg problematic per la libra furmaziun da l’opiniun e la libertad d’opiniun che saja uschè impurtanta per la democrazia svizra, hai num da vart da l'allianza.
Avant circa in onn aveva il Cussegl dals chantuns approvà la midada. Ina clera maioritad da la chombra pitschna aveva argumentà ch'i dettia oz in dischequiliber tranter burgaisas e burgais dad ina vart e las medias da l'autra vart.
