Siglir tar il cuntegn

Header

Feglia dad in fau che traglischan en il sulegl.
Legenda: Las observaziuns dal WSL mussan che cunzunt ils faus pateschan da la setgira da l'onn passà. Keystone
cuntegn

Svizra Setgira dal 2018 ha laschà fastatgs en il guaud

Nagina muria dal guaud, dentant dapli plantas che perdan la figlia, setgan ora e ston vegnir pinadas. Quai è tenor l’Institut federal per la perscrutaziun da guaud, naiv e cuntrada (WSL) la consequenza da la stad sitga l’onn passà.

En bleras regiuns da la Svizra saja la stad passada stada la perioda la pli lunga e pli chauda senza plievgia dapi ch'ins haja entschet avant passa 150 onns a notar sistematicamain l'aura. Ils guauds hajan perquai era entschet a perder la feglia in bainquant pli baud. Las consequenzas da quai sa mussian ussa, scriva il WSL.

En emprimas regiuns, per exempel a Basilea-Citad, hajan ins stuì pinar parts dal guaud pervia dal donn da setgira. Quai betg il davos per proteger ils viandants sin vias e sendas. Ultra da quai hajan experts observà che tschertas plantas creschian pli pauc e ch'i haja dà dapli incendis pervia da culps da chametg.

ll pli ferm pateschian ils faus da las consequenzas da la setgira. Quellas plantas han ragischs che n’èn betg uschè profundas ed ellas na pon betg profitar avunda d’auas sutterranas.

RR novitads 17:00