Il Cussegl naziunal vul chastiar la distribuziun da fotografias e videos intims via messadis mobils, l’uschenumnà sexting. L’objecziun da la cussegliera federala Sommaruga ch’i dettia gia leschas effectivas è sa persa per gronda part senza chattar udida.
Sexting munta la communicaziun privata davart temas sexuals via messadis mobils. Dapi ch’i dat Multimedia Messaging Services (MMS) e Whatsapp è la noziun er in sinonim per trametter maletgs (erotics) da l’agen corp. Il terminus sexting sa cumpona da las noziuns «sex» e «texting» (engl. scriver SMS).
Per quai vai
Il sexting na crescha betg drasticamain, ma da principi bain. Perquai ha Viola Amherd (PCD/VS) inoltrà ina moziun per prender si il sexting en il cudesch da dretg penal. Per Amherd n’èn la sensibilisaziun e la cumpetenza mediala betg avunda prevenziun. I dovria cleras reglas che scumondian la distribuziun da fotos e videos intims.
Il resultat
Il Cussegl naziunal n’è betg cuntent cun las regulaziuns vertentas e vul prender si il fatg penal en il cudesch da dretg penal. El ha acceptà la moziun da Viola Amherd cun 124 cunter 43 vuschs e 18 abstenziuns.