Siglir tar il cuntegn
cuntegn

Svizra Sextorsiun via snapchat – giuven svizer arrestà

En il chantun Lucerna ha la polizia arrestà in giuven da 17 onns. El vegn suspectà dad avair extorcà ina giuvna da 14 onns cun fotos ch'ella era niva. Quai rapporta l'agentura da novitads SDA sa referind ad ina communicaziun da la procura publica lucernaisa.

Icon da snapchat.
Legenda: Las activitads sin medias socialas sco snapchat san avair consequenzas giuridicas. Keystone

Sin la plattafurma sociala snapchat haja il giuven scrit cun la giuvna - e surmanà ella da trametter fotografias ch'ella è niva. Suenter haja il giuven pretendì 400 francs, per betg publitgar las fotos en l'internet. En ina surdada anonima haja el survegnì ils raps e lura cuntinuà da pretender daners.

La giuvna ha silsuenter alarmà la polizia ch'ha pudì identifitgar il delinquent supponì per «sextorsiun». El saja vegnì arrestà en ses lieu da domicil en il chantun Lucerna, ha communitgà la procura publica.

La procedura saja stada pretensiusa, perquai ch'ins haja stuì pretender las datas via dumonda d’assistenza giudiziala en ils Stadis Unids. Là è la sedia da l'interpresa Snapchat.

Sextorsiun (en engl. sex-tortion)

Cun questa noziun vegn descrit ina furma dad extorsiun, che pertutga surtut giuvnas. Ellas vegnan surmanadas via medias socialas da trametter fotografias che mussan ellas nivas. Cun quellas vegnan ellas suenter messas sut squitsch u extorcadas massivamain.

La Prevenziun criminala svizra cusseglia perquai tranter auter da

  • betg far amicizias u inscunters en las medias socialas cun persunas ch’ins enconuscha betg en la vita reala,
  • da betg far en in video-chat insatge per tge ch’ins stuess star mal suenter e
  • da surtatgar u deactivar la webcam adina, sch’ins n’è betg en in video-chat.

RR novitads 12:00