- La PS trametta il president da la regenza da Basilea Beat Jans ed il cusseglier naziunal grischun Jon Pult en las elecziuns dal Cussegl federal ils 13 da december.
- La fracziun propona Pult e Jans sco successurs pussaivels dal cusseglier federal Alain Berset, quai ha la partida communitgà a Berna.
- Omadus hajan pudì mussar persvadent a la fracziun, co ch'els veglian furmar la Svizra pli socialmain e manar il pajais en l'avegnir, ha ditg la presidenta da fracziun da la PS, Samira Marti, avant las medias a Berna.
- Igl ha duvrà 18 scrutinis fin ch'il ticket da dus umens è vegnì fixà.
Jon Pult
Il cusseglier naziunal grischun Jon Pult (annada 1984) era vegnì numnà da blers sco successur pussaivel da Berset, l'entschatta d'october ha el lura annunzià ses interess per il sez da Berset. El, che sa numna sez Grischun triling, è dapi quatter onns en il Cussegl naziunal e vala sco in dals pli gronds talents da la PS e sco bun retoricher. Gia in onn suenter ch'el è entrà en il parlament ha la PS fatg or dad el in da ses vicepresidents. Sco commember da la regenza vuless Pult rinforzar la coesiun da la Svizra. Sfidas las pli grondas ha Pult numnà la refurma dal sectur da sanadad, la politica dal clima e la politica d'Europa. In uffizi executiv n'ha Pult fin uss anc betg gì.
Beat Jans
Beat Jans (annada 1964) ha annunzià ils 22 da settember a chaschun d'ina conferenza da medias ch'el veglia daventar cusseglier federal. Che Jans possia candidar, na sa chapeschia betg da sez per el. I fiss ina «onur incredibla» da dastgar scriver vinavant vi da l'istorgia svizra, ha ditg Jans. Observaturs politics vesan Jans sco in dals favurits sin il post da regenza. Dapi il 2021 è el president da la regenza e schef dal departament presidial dal chantun Basilea-Citad. Dal 2010 fin 2020 è el stà cusseglier naziunal. Durant ses temp sco parlamentari federal è el stà durant tschintg onns vicepresident da la PS Svizra.
Tschintg umens, ina dunna
Per la successiun da Berset èn s'annunziads sis candidats. Quatter dad els èn umens da la Svizra tudestga: il cusseglier naziunal bernais Matthias Aebischer, il cusseglier naziunal girschun Jon Pult, il president da la regenza da Basilea-Citad Beat Jans sco era il cusseglier dals chantuns turitgais Daniel Jositsch.
Sco suletta dunna aveva la cussegliera guvernativa bernaisa ed anteriura cussegliera naziunala Evi Allemann annunzià interess per il sez dal cusseglier federal che vegn liber. Il sulet candidat da la Svizra romanda era il cusseglier naziunal dal Vad, Roger Nordmann.
