Ils viticulturs svizzers quintan cun ina vendemia bler pli pitschna. Pervia da la plievgia da las ultimas emnas sa derasia la malsogna da bulieu «sfarinussa faussa» (falscher Mehltau) pli fitg en las vignas. La plievgia haja creà bunas cundiziuns per la derasaziun da la malsogna.
Mitschà senza gronds donns è il Grischun e la gronda part da las vignas en il Signuradi. La sfarinussa fuassa saja bain in tema, ils donns sajan dentant limitads, ha declerà Walter Fromm, il cumissari da viticultura dal Plantahof. Gia la primavaira hajan ins gì fortuna e vegnì pulit bain dasper la schelira ora ed er granella n'haja betg dà blera.
Vallais, Vad e Tessin fitg pertutgà
Fitg pertutgà da la derasaziun dal bulieu sajan las vignas en il Vallais. Uschia ha declerà Pierre-André Roduit, manader da l'uffizi da viticultura dal Vallais envers l'agentura da novitads Keystone/SDA. I n'haja strusch ina giada pluvì uschè bler sco quest onn. Entras quai saja la sfarinussa faussa sa derasada rasantamain. Tenor la gasetta «Walliser Bote» quintian tscherts purs da vin en il Vallais cun perditas da racolta enfin 80%. Er en il chantun Vad sco er en il sid da las Alps fan las viticulturas ed ils viticulturs quint cun grondas perditas.
