Dapi onns è la finamira clera: La squadra naziunala svizra da hockey sin glatsch vul daventar campiun mundial. Gia duas giadas hai tanschì be per la segunda plazza, quest onn vegn empruvà anc ina giada. Tge che capita sin la plazza da gieu ves'ins en la televisiun, las istorgias davos las culissas n'èn però betg per tuts visiblas.
In che tschiffa quellas istorgias ed emprova da documentar quels muments cun la camera è Andri Zala. L'oriund da Zernez viva a Turitg e lavura sco digital content producer tar la Federaziun svizra da hockey sin glatsch.
Andri Zala è producent da cuntegns digitals tar la Federaziun svizra da hockey sin glatsch. El dat invista en sia lavur e raquinta anecdotas dal campiunadi mundial 2025. Sper sia lavur gioga el sez tier l'EHC Urdorf hockey en segunda ligia.
Andri Zala, Vus essas part dal team da social media per la Federaziun svizra da hockey sin il glatsch. Co vesa Voss pensum ora exact, forsa gist uss en connex cun il campiunadi mundial?
Mia lavur è tut differenta, dependa adina in pau tge che capita sin il glatsch. Nus avain divers cuntegns che nus faschain mintga di sch’igl è in gieu, resultats, gols ed uschè rauba ed il rest capita spontan tut tenor tge che capita sin glatsch. I dat adina istorgias ch’ins po quintar e mia lavur è da tschertgar questas istorgias e raquintar quellas sin social media.
Pia da tschiffar muments, raquintar istorgias e probabel era reagir fitg spert. È quai lura tut spontan che Vus faschais u datti in plan, forsa sin in script che stat davos tut quai?
Nus n'avain nagins scrips, nus avain ina tscherta idea tge che pudess capitar, differentas versiuns e quellas sa midan lura tut tenor tge che capita durant ils gieus. Noss focus è era sin il sport, nus vulain dentant era mussar al public tge che capita davos las culissas ed adina esser fitg flexibels.
Esser flexibel sco Vus schais munta probabel d’esser pinà e savair reagir. Lura stuais probabel esser adina enturn l’equipa naziunala. Gida quai lura forsa in pau che Vus dais era sez hockey en la segunda liga tar il EHC Urdorf?
Jau sun bler enturn ils giugaders da la naziunala, jau pens ch'igl è segir in tschert avantatg ch'jau gioga sez hockey, ma a la fin finala, era sche jau na dess betg hockey, na midass quai betg bler. Ils giugaders èn fitg averts, nus essan sco ina gronda famiglia.
Voss pensums èn lura da documentar, da raquintar in pau las istorgias da questa gronda famiglia sin social media – il bler cun maletgs ma era cun texts. Quels texts vegnan il pli scrits per tudestg, talian e franzos. N'avais Vus mai pensà da translatar quests texts per rumantsch, perquai che rumantsch è era Vossa lingua mamma?
Gea, nus avain era gia discutà da scriver per rumantsch, ma igl è gia grev da restar curt en trais linguas e lura far anc ina quarta lingua fiss anc grev. Era la gronda part dals videos èn per tudestg, perquai che la gronda part dals giugaders discurran tudestg ed uschia èsi gia avunda grev da producir cuntegns per talian e per franzos.
Ed uss en vista al campiunadi mundial: Co è quai lura per Vus da savair lavurar ensemen cun la squadra naziunala, ils megliers giugaders svizzers?
Per mai èsi relativ simpel qua a Herning da lavurar cun ils giugaders, cun noss stars da hockey. Igl è il terz onn che jau sun da la partida al campiunadi mundial ed jau enconusch ils blers giugaders ed igl è in lavurar colleghial, propi sco en ina gronda famiglia e nus avain in bun temp qua.
E da quest bel temp che Vus schais datti segir ina u l’autra anecdota, che Vus pudessas raquintar, che la glieud che guarda ils gieus en televisiun na vegnan gnanc a savair.
Jau pens ch’i dat diversas anecdotas en connex cun il campiunadi mundial. Segir or da la vista da sport era l’onn passà la medaglia d’argient in highlight. E quest onn è per mai fin ussa cura ch'Andreas Ambühl è turnà en gardaroba suenter ses hattrick, quai era in fitg bel ed emoziunal mument. Era co ch'ils giugaders han retschavì el. Quai era propi in mument spezial, ch'ins n'ha betg pudì guardar en televisiun, ma cunquai che nus eran là cun nossas cameras è quest mument tuttina vegnì documentà e derasà en social media.
E co recepis Vus lura l'atmosfera, la luna da l'equipa en la cabina?
L'atmosfera en cabina è en general è fitg buna, nus essan propi ina gronda famiglia nua che mintgin respecta mintgin. Nus ans legrain che nus dastgain uss ir a Stockholm e lura guardain nus tge che capita.
