Suenter il drama da famiglia a Montreux stat in suicidi collectiv en il center da las investigaziuns. Ensainas per in tal act n'haja betg dà avant, scriva la Polizia chantunala dal Vad tschintg dis suenter il drama. I saja sa mussà che la famiglia s'interessava dapi l'entschatta da la pandemia fitg per teorias conspirativas e strategias da surviver. Ils tschintg confamigliars d'origin franzos eran siglids ord in'abitaziun en il 7avel plaun d'ina chasa a Montreux. Survivì ha sulet in giuvenil da 15 onns – ch'è en il coma.
Sco la polizia scriva vinavant, haja la famiglia gì ina gronda reserva da victualias en l'abitaziun. Pliras stanzas da l'abitaziun sajan stadas emplenidas cun quai. La famiglia vivevia quasi autarc e separada da la societad. Sulettamain la sora da la mamma mava a lavurar.
Ina patruglia da la polizia haja la bun'ura empruvà da contactar il bab da la famiglia perquai ch'el n'era betg suandà ad ina bannida. Ils polizists hajan stgalinà e sajan suenter in per minutas puspè ids, perquai che nagin haja avert l'esch. Curt suenter èn las tschintg persunas siglidas ord il 7avel plaun.
