Siglir tar il cuntegn

Header

cuntegn

Silvester L'onn nov è gia arrivà en intgins pajais

En intgins pajais è l'onn 2020 gia arrivà. Uschia er a Samoa ed en Nova Zelanda. En la citad la pli gronda Auckland, è la Harbour Bridge vegnida illuminada. La tur da televisiun, Sky Tower ha spidà rachetas da ses spitg.

L'Australia cun fieu artifizial, malgrà incendis

Tar nus da las 14:00 uras ha l'onn nov cuntanschì l'Australia. A Sydney hai dà da mesanotg in fieu artifizial spectacular sur il port. En vista als incendis gronds en la regiun hai dà avant la festa ina rimnada da suttascripziuns per ina petiziun che ha vulì scumandar la show. Tschient millis han suttascrit quella. La citad è dentant restada tar ses plan. Ils pumpiers han dà ina lubientscha excepziunala per il fieu artifizial.

Purtret d'in fieu artifizial sur l'opera a Sydney.
Legenda: Il fieu artifizial ha gì lieu malgrà ils incendis che furieschan il mument betg lunsch davent. Keystone

Giapun: Tutgiez da tempels budistic

En il Giapun è l'onn nov vegnì beneventà cun in tutgiez dals tempels, tar nus a las 16:00 uras. Ils proxims dis vegnan milliuns Giapunais a visitar ils tempels e reliquiaris dal pajais per rugar per fortuna e bainstanza.

Purtret d'in grond zain en il Giapun.
Legenda: In dals zains che vegn tutgà da Silvester en il Giapun. Keystone

A Hongkong en la China han ins l'ultim mument ditg giu il fieu artifizial planisà. L'autoritad da turists ha declerà quest pass cun motivs da segirezza. Ins haja temì ch'i pudess dar acziuns da protesta.

Las partys da Silvester da l'Europa

A las 22:00 uras beneventa Moscau l'onn nov. Anc in'ura ordavant èn intgins pajais da l'ost. En Germania datti la pli gronda festa a Berlin a la Porta da Brandenburg. Per l'emprima giada ha la chapitala scumandà rachetas e murters, betg be tar la porta mabain er pli lunsch davent.

En l'Italia ha la polizia confiscà ina massa material da fieus artifizials illegal. Sulet a Neapel sa tracti da 52 tonnas. En bleras citads talianas èn fieus privats scumandads. A Roma ristgan ins in chasti da 500 euros.

Londra festivescha tar la roda gronda

En la chapitala britannica Londra, vegnan spetgads passa 100'000 visitader tar la roda gronda, London Eye. Els vegnan in onn suenter Berlin en l'onn nov 2020.

Purtet dal london eyer.
Legenda: Il «London Eye». Keystone

En Svizra vegn laschà davent il fieu artifizial

Pliras citads svizras midan lur fieus artifizials da Silvester e Bumaun, quai per prender resguard sin l'ambient. A Basilea vegn il fieu reducì per in terz per sbassar l’impestaziun cun pulvra fina. A Turitg han ils organisaturs communitgà da vulair cumpensar il fieu artifizial neutral al clima.

Berna fa la midada da l'onn senza fieu artifizial en la citad veglia. A Son Gagl èn fieus artifizials e petardas scumandadas ord resguard sin il quartier che vala sco patrimoni cultural da l'Unesco.

Ord l'archiv:

RTR novitads 16:00

Artitgels legids il pli savens

Ir a sanester Ir a dretg