Siglir tar il cuntegn

Header

audio
Sommaruga: «In provediment d'energia segir è central»
Or da Actualitad dals 03.02.2022.
laschar ir. Durada: 3 minutas 14 Secundas.
cuntegn

Simplifitgar proceduras Cussegl federal vul dar gas a projects d'energia da vent ed aua

Ils proceders per bajegiar gronds implants d'energia d'aua e vent cuzzan savens ditg. Perquai che tals projects sajan da gronda impurtanza per la Svizra, vul il Cussegl federal adattar la lescha d'energia per accelerar tals projects.

Pli simpels duain cunzunt ils proceders da planisar e construir novs implants daventar – e quai senza tralaschar la protecziun da l'ambient, da la natira e da monuments. Uschia scriva la regenza. Ozendi possia quai esser ch'i cuzzia enfin 20 onns tranter la projecziun d'in implant e la realisaziun da quel. Sper quai vul il Cussegl federal er promover la fotovoltaica, quai cun lubir pli tgunsch implants vid fatschadas ed er cun reducziuns da taglia. Questas propostas en la lescha d'energia trametta il Cussegl federal uss en consultaziun.

Nov concept per planisaziun chantunala

Il mument manchia ina planisaziun naziunala per l'energia da vent ed aua. Plinavant na dettia er naginas perscripziuns dal dretg federal per avair proceders effizients da planisar e construir tals projects. L'idea saja da simplifitgar ed unifitgar las reglas per planisar e construir ed uschia perder uschè pauc temp sco pussaivel. Concret vul quai dir ch'in project na pudess betg vegnir tratg avant dretgira tar mintga etappa che vegn lubida.

Energia solara tar construcziuns novas

Il Cussegl federal vul er anc promover implants d'energia solara. Tetgs e fatschadas da bajetgs hajan anc in grond potenzial che na vegnia savens betg nizzegià. Perquai vul la regenza er sustegnair implants fotovoltaics che vegnan fatgs vid bajetgs novs. Concret pon er questas investiziuns vegnir tratgas giu da la taglia. Enfin ussa pon be custs tar sanaziuns vegnir tratgs giu da la taglia, ma betg tar construcziuns novas. Plinavant vul il Cussegl federal lubir pli simpel implants solars vid fatschadas. Da nov duai tanscher cun annunziar talas, enstagl da dumandar lubientscha. Excepziuns poi dar en zonas da protecziun.

La consultaziun cuzza enfin ils 23 da matg.

video
Annunzia enstagl da lubientscha per implants solars
Or da News-Clip dals 03.02.2022.
laschar ir. Durada: 24 Secundas.

RTR novitads 08:30

Artitgels legids il pli savens

Scrollar a sanestra Scrollar a dretga