Il Sindicat svizzer dals servetschs publics VPOD refusa la cunvegna da basa cun l'Uniun Europeica. Il sindicat sustegna dentant la via bilaterala. Quai communitgescha il VPOD suenter il segund di da ses congress a Son Gagl.
Tar la protecziun da la paja na dettia nagins cumpromiss ed er attatgas cunter il service public n'acceptian els betg, scriva il VPOD. Avant il congress era vegnì speculà ch'il VPOD pudess approvar la cunvegna da basa ed uschia sa distanziar da l'Uniun sindicala svizra.
Nagin sustegn per cunvegna actuala
Sco la presidenta dal sindicat, Katharina Prelicz-Huber, ha ditg sin dumonda da l'agentura da novitads Keystone-SDA, na saja quai mai stà punct da discussiun. Il VPOD saja adina stà da l'opiniun ch'el saja bain per ina cunvegna da basa, na sustegnia dentant betg la cunvegna ch'è avant maun. Quai hajan ils stgars 200 delegads preschents lura er confirmà unanimamain.
Plinavant han ils commembers reelegì Katharina Prelicz-Huber sco presidenta e Stefan Giger sco secretari general.
RR novitads 16:00