La polizia regiunala haja sinaquai supplitgà las studentas e students da bandunar la plazza e dad ir en in auter lieu per pudair tegnair en las reglas da distanza.
Pli tard ha la polizia chantunala dentant schlià la party betg lubida. Set giuvenils, che hajan bittà chaussas en direcziun dals policists e policistas sajan vegnids arrestads. Donns da persunas e da material n'hai dà nagins.
Cas pli grond en Belgia
A Brüssel hai dà charplinas tranter la polizia e giuvenils. La polizia da la Belgia discurra da 5'000 giuvenilas e giuvenils, che sajan vegnids ensemen en in parc da la chapitala. Medias discurran percunter be da 2'000 persunas. Ils giuvenils n’hajan betg resguardà las reglas da distanza e d’igiena. La polizia haja duvrà gas lacrimogen e squittas d’aua. Ils giuvenils hajan bittà buttiglias ed envidà barricadas.
Motiv per l’inscunter saja stadas in’annunzia sin Facebook e l’aura primavauna. In motiv politic n’haja betg dà.
Co vai cun la giuventetgna?
L’onn da corona ha pretendì bler da la giuventetgna, ch’è en ina fasa da la vita, nua ch’il sa barattar cun collegas, amis ed amias è fitg impurtant. Co vai cun giuvnas e giuvens? Quella dumonda fan ils «Cuntrasts» da questa dumengia.
