Svizras e Svizzers paran dad esser pli cuntents cun lur sistem politic ch'ils vischins en l’Uniun europeica. Quai scriva la «NZZ am Sonntag» che sa referescha ad ina retschertga da l’institut gfs.berna. En Svizra sajan 90% da las persunas dumandadas cuntentas u schizunt fitg cuntentas cun il sistem politic.
En Germania, l’Austria, la Frantscha e l’Italia sajan percunter be 50% cuntentas cun il sistem da l’UE. Dumandadas èn vegnidas mintgamai 1'000 persunas en Svizra ed ils pajais vischins.