La situaziun actuala da corona è fragila – da quest avis èn diversas parlamentarias e parlamentaris grischuns. Tuts dumandads èn er d'accord ch'il Cussegl federal so uss agir.
Uschia pledescha per exempel il cusseglier dals chantuns Martin Schmid per il bosster per tuts. I na possia betg esser che persunas che vulan il bosster hajan da spetgar sis mais suenter la segunda vaccinaziun per ir per la terza dosa dal vaccin. En auters pajais hajan ins er dà liber il booster gia suenter quatter mais. Tenor Schmid saja quai urgent ch'il Cussegl federal lubescha a tuttas e tuts che vulan, ch'i possian er ir a laschar vaccinar ina terza giada e quai svelt.
Dentant han per el ils tests prioritad. Il cusseglier dals chantuns grischun vul ch'il Cussegl federal midia puspè la strategia da testar. Mintgina e mintgin duai avair la pussaivladad da sa testar duas fin trais giadas l'emna sch'ella u el è vaccinà u betg. En la situaziun che nus sa chattain na possian nus betg sa lubir da far differenzas, di el. I giaja per la sanadad ed il testar saja in med effectiv en il cumbat encunter il coronavirus.
Betg reducir la cifra d’inscunters privats
La cussegliera naziunala Anna Giacometti pudess encleger sch'il Cussegl federal decida da reducir il dumber da persunas tar occurrenzas. Dentant na vesess ella betg ina reducziun en il rom privat sco soluziun adequata. Bleras persunas sajan vaccinadas e sappian co sa cumportar, perquai spera ella che la festa da Nadal na vegnia betg periclitada pervi da mesirars.
I fetschia dentant senn ch'i dettia mesiras naziunalas. Uschia di era la cussegliera naziunala Sandra Locher-Benguerel. Mesiras naziunalas sajan era giavischadas dals chantuns.
Schlargiar l’obligatori da la mascra e reducir l’inscunter da persunas sajan mesiras che fissan uss adequatas. Dentant betg mesiras pli diras cun quai che la situaziun en ils ospitals saja entant anc sut controlla. Era sch'ils indizis mussan ch'i pudess sa sviluppar en in'autra direcziun, di Locher-Benguerel.
Sesida extraordinaria
Il Cussegl federal s'inscuntra quest suentermezdi per ina sesida extraordinaria. Tenor rapports da medias vegn la regenza a discutar tranter auter da reducir il numer da persunas che sa pon inscuntrar en il rom privat, sur da la durada da la valaivladad dals tests e da schlargiar l'obligatori da la mascra.