- Il BAG annunzia 3'008 novs cas aifer 24 uras per la Svizra ed il Liechtenstein
- En il Grischun èsi vegnì registrà 21 novs cas aifer 24 uras
- 10 persunas infecteschan il mument 16 ulteriuras
- Tut ils chantuns èn entant sur la limita da ristga da 60 infecziuns sin 100'000 persunas
La cifra da reproducziun è il mument tar 1,6. Quai munta che diesch persunas infecteschan 16 ulteriuras persunas. La Svizra haja cunquai oz dubel uschè blers cas sco l'Italia.
Tuts ston evitar contacts nua ch'igl è pussaivel.
Tut ils chantuns èn il mument cleramain sur la valur da ristga da 60 infecziuns sin 100'000 abitants. Durant las ultimas emnas observa l'Uffizi federal da sanadad in augment da las novas infecziuns en tut las classas da vegliadetgna.
Il dumber dals cas da questa segunda unda na possia però betg vegnir cumpareglià cun quel da l'emprima, ha ditg Kuster. I vegnia fatg bler dapli tests. Tar il dumber da las ospitalisaziuns ed ils mortoris possian ins percunter cumparegliar las cifras. Perquai stoppian ussa tuts sa tegnair vi da las reglas ed evitar contacts nua ch'igl è pussaivel.
Positiv saja il svilup tar ils tests sperts. Ussa stoppian ins decider tgi che po far quests tests u tge che capitia cun las persunas testadas positiv. Er anc da sclerir saja tgi che paja quests tests. Dumondas che vegnian scleridas las proximas emnas, uschia Kuster.
Segundas undas èn zaias e duran per regla pli ditg.
L'augment dals cas chaschunia il mument in augment enorm da la lavur per ils servetschs da lavur chantunals, ha ditg il medi chantunal da Basilea, Thomas Steffen. Quai betg mo tar il contact tracing mabain er pervia d'in augment en hotspots sco scolas ed equipas da sport. La segunda unda vegnia ad accumpagnar la Svizra durant l'atun e l'enviern.
Champs da skis pussaivels dentant pretensius
Respundì ha Steffen era ina dumonda davart ils champs da skis per uffants e giuventetgna, che bleras scolas da la Bassa organiseschan mintgamai l’entschatta da l’onn. Quels na veglian els betg scumandar, cunquai ch’i saja pussaivel d’organisar els cun precauziun.
I dovria però las dretgas localitads da pernottar, nua ch'ins possia era separar e controllar il cumportar dals participants. Natiralmain ch'i dovria er qua in concept da segirtad. Sch'i dettia tuttina cas en in champ, dovria las mesiras correspundentas per isolar e suandar las infecziuns.
