Siglir tar il cuntegn

Header

cuntegn

Situaziun da fugia Passa 30'000 dumondas d'asil l'onn 2023

Il dumber da dumondas d'asil è danovamain s'augmentà l'onn passà. I manca bain anc ina statistica definitiva, dentant dastgassan passa 30'000 dumondas d'asil esser vegnidas ensemen. Confederaziun, chantuns e vischnancas han perquai stuì organisar alloschis supplementars. E las cifras dastgassan er restar autas l'onn 2024, quai mussan emprimas stimaziuns da la Confederaziun.

Tenor quests «scenaris nunliants» quinta il Secretariat da stadi responsabel per la migraziun (SEM) cun var 28'000 dumondas per l'onn current. La fluctuaziun è tar +/- 2000. Dentant pudess il dumber er anc s’augmentar. Il SEM scriva vinavant: «In augment è imaginabel, ina reducziun percunter plitost pauc probabla.»

Augment suenter l'avrigl?

Ils mais d'enviern van las dumondas tenor experientscha mintgamai enavos in zic. Sin il pli tard a partir da l'avrigl, cura che la Mar Mediterrana vegn puspè pli ruassaivla, pudessan las cifras dentant puspè crescher. Il secretariat da stadi quinta era quest onn cun quai. La chargia en il sistem d'asil resta pia vinavant auta il 2024.

Tar las dumondas ordinarias d'asil vegnan anc vitiers las dumondas per il status da protecziun S. Anc adina fan mintg'emna radund 500 persunas da l'Ucraina ina dumonda per dar il status S. Actualmain sa chattan tenor indicaziuns dal secretariat statal per migraziun radund 66'000 persunas cun status S en Svizra.

Or da l'archiv:

video
Il dumber da persunas fugidas crescha er en Grischun
Or da Telesguard dals 14.11.2023.
laschar ir. Durada: 2 minutas 52 Secundas.

Status S: cifra stabila

Perquai ch'il dumber da las novas dumondas da status S e da las persunas che bandunan puspè la Svizra da l'Ucraina è circa uschè grond, resta il dumber da las persunas cun status S en Svizra relativamain stabil dapi intgins mais.

Er ina prognosa dals currents da migraziun che sa resultian tras la guerra en l'Ucraina saja difficila, hai num tar il SEM. Tar las 500 dumondas emnilas hai num: «Questa valur dastgass sa fermar u sa sbassar levamain l'onn 2024.»

RTR novitads 11:00

Artitgels legids il pli savens