L'emprima giada dapi 20 onns è il schaner 2018 en bleras parts da la Svizra vegnì prognostitgà il pli aut nivel da privel da lavinas. Malgrà che 150 lavinas che han fatg donns èn idas a val durant il schaner 2018, n’hai dà naginas unfrendas en vischnancas e territoris segirads. Las mesiras da protecziun ch’èn vegnidas instradadas il 1999 funcziunan. Quai mussà ina analisa da l'Institut per la perscrutaziun da la naiv e da las lavinas.
Plirs dis privel da lavinas «fitg grond»
En il temp dal 15 da schaner e rinforzà dal 21 fin 23 da schaner 2018 hai dà en las Alps en insaquants lieus dapli che 3 meters naiv. La situaziun da lavinas era extraordinaria. La prima giada dapi il 1999 è vegnì prognostitgà durant in di e mez il pli grond nivel da privel 5 «fitg grond». Uschia era il schaner 2018 il prim test per la protecziun cunter lavinas dapi il favrer 1999.
Aut standard da protecziun
L'Institut per la perscrutaziun da la naiv e da las lavinas vegn tar la conclusiun che las mesiras da protecziun han dumagnà il test. Plinavant hajan ils servetschs da lavinas, malgrà situaziuns pretensiusas, fatg buna lavur. Per supportar las sfidas vegnindas stoppian Confederaziun, chantuns e vischnancas dentant tegnair il aut standard da protecziun.
RR novitads 15:00