Malgrà che la situaziun economica da bleras interpresas en Svizra saja sa meglierada, mussa la nova retschertga d'Economiesuisse che bleras fatschentas ed associaziuns èn scepticas. La crisa na saja betg superada ed i vegnia fatg quint cun in grev enviern, uschia il facit da l'associaziun d'economia. Cunzunt per l'industria d'export saja la situaziun anc adina tendida.
Nagin meglierament en la branscha d'export
Radund in 5avel da las fatschentas dumandadas ha inditgà ch'i giaja mender cun ellas. Quai pertutgia cunzunt la branscha d'export, danor l'industria da farma. La situaziun d'exports saja anc betg sa revegnida. Dapli che 70% da las interpresas d'exports han problems da vendida e na quintan betg cun meglierament ils proxims dus mais.