Siglir tar il cuntegn

Header

Ina scena en ina resgia, in grond toc lain vegn resgià.
Legenda: Il trend mussa ensi: Per l’industria da lain e palpiri prognostitgescha il KOF in bun svilup. Keystone
cuntegn

Svizra Situaziun economica resta stabila durant il mars

L'economia svizra dastgass er ils proxims mais sa sviluppar a moda positiva. Il barometer da conjunctura dal KOF n'è strusch sa midà il mars, communitgescha il post da perscrutaziun da l'ETH da Turitg.

La valita dal barometer da conjunctura per il mars munta a 102,5 puncts. La valita per il favrer munta suenter la revisiun 102,6 puncts. Uschia n’hai pia dà nagina gronda midada.

Signals positivs hai surtut dà dal consum privat. Main buns èn ils indicaturs per l'industria e l'export. Be pitschnas midadas hai dà tar la branscha da construcziun ed il sectur da finanzas. Ed er la situaziun da la hotellaria è restada pli u main stabila.

Ulteriura reducziun da plazzas vegn spetgada

Signals positivs han ils economs dal KOF localisà tar las empustaziuns sco er tar ils indicaturs davart la producziun. Negativ sa preschenta la situaziun areguard l’occupaziun. Igl è da far quint ch’ulteriuras plazzas vegnan stritgadas.

Aifer l’industria elavuranta vegnia la tendenza negativa cunzunt muventada da l’industria da textilias. Ed er per l’industria da construcziun en metal, l’elavuraziun da metal e la branscha da victualias sto sa preparar sin temps main avantagius.

Il barometer da conjunctura è in indicatur tempriv per il svilup economic.

RR novitads 10:00

sda/alb

Artitgels legì il pli savens

Nach links scrollen Nach rechts scrollen