La bieraria Chopfab Boxer SA da Winterthur è per entant spendrada. La Bieraria Appenzellaisa Locher – che producescha la biera Quöllfrisch – ha surpiglià la maioritad da las aczias. Ina cundiziun per surpigliar la maioritad d'aczias era in «tagl da debits». Bancas, furniturs, acziunars ed autras partidas involvidas stuevan relaschar ina part da lur debits.
Chopfab resta independent
Locher ha accentuà che l'interpresa restia independenta. Ins saja participà, ma i na sa tractia betg d'ina fusiun u d'ina absorpziun. Er las var 80 persunas che lavuran per la Chopfab Boxer SA duain tegnair lur job.
La firma Chopfab Boxer SA è er responsabla per la logistica e la distribuziun da la biera Tschlin SA. Gia il favrer ha la bieraria engiadinaisa annunzià che la situaziun finanziala da Chopfab na vegnia betg ad avair consequenzas negativas.
