Ina situaziun piz a cup, di Claude Longchamp da gfs.Berna, in dals auturs dal barometer. Normalmain saja quai uschia ch'il dumber da las persunas che sustegnian in'iniziativa prendia giu en il decurs da la campagna. Tar iniziativas che vegnian lantschadas da la dretga possia quai dentant era esser auter. In bun indicatur saja en tals cas la dumonda, tge che schabegiass, sche la participaziun a la votaziun creschiss fermamain. En quest cas profitassan cunzunt ils iniziants, di Longchamp.
La cumpart dal gea creschiss sin 57%. E tar quest sustegn fiss perfin pussaivel che l’iniziativa cuntanschess ina maioritad dals stans. Tut dependa pia da la mobilisaziun e pli pauc da la tematica sezza.
Che las opiniuns èn per gronda part gia fatgas mussa era in sguard sin las partidas. Tenor la retschertga da gfs.Berna sustegnan 89% dals aderents da la PPS l'iniziativa da l'atgna partida. Da l'autra vart vulan 76% dals aderents da la PS e 71% dals aderents dals Verds metter in na en l'urna. Era tar la PCD datti ina maioritad: Numnadamain vulan 55% votar cunter l'iniziativa. Divididas èn las opiniuns tar la PLD. Quai malgrà che la partida ha avant paucas emnas decidì la parola da na.
Claude Longchamp fa endament ch'ils resultats mussian mo la situaziun actuala da las opiniuns. Las proximas emnas possia quai anc dar moviment. Betg il davos era pervi dals arguments che vegnian ussa discutads. El haja il sentiment che surtut l'argument dals adversaris - ch'il parlament haja gia elavurà ina lescha per repatriar esters criminals sin basa da l’emprima iniziativa da repatriament - che quest aspect na saja anc betg tematisà endretg.
Resumond pon ins pia dir: Sch’i dat in gea ni in na a l'iniziativa da la PPS per il repatriament effectiv da esters criminals, dependa dal decurs da la campagna e da la mobilisaziun da las votantas e dals votants.
Ils auters projects fissan era approvads, betg tuts tuttina cler.
RR novitads 17:00
