Sur emnas èn differentas cifras da corona idas enavos. Uss quinta l'Uffizi federal da sanadad cun ina stabilisaziun da las novas infecziuns, quai sin relativamain aut nivel. Ch'il squitsch sin las instituziuns da sanadad laschia vinavant suenter en il medem tempo, na saja però betg da spetgar, ha ditg Patrick Mathys dal BAG avant las medias a Berna. Da princip saja la situaziun relativamain buna. En intgins chantuns muntagnards creschia il dumber da las infecziuns novas dentant gia puspè. Vitiers ha Mathys ditg che l'occupaziun da las staziuns intensivas restia auta.
Qualitad da tests na cuntenta betg dapertut
Controllas entras las autoritads ed er resuns ord la populaziun hajan mussà mancos tar purschidas da tests. I saja impurtant che las purschidas adempleschian las perscripziuns, ha ditg Linda Nartey, vicepresidenta da l'Uniun da las medias ed ils medis chantunals. Er ils concepts da schurmetg en quest connex e la scolaziun dal persunal na sajan betg da negligir.
