Suenter in curt mument serain la sonda suentermezdi haja puspè pluvì enavant en Svizra Orientala. I vegn cumbattì da tut las varts cun auas grondas e problems da traffic. Tenor SRF Meteo sa calmia l'aura dentant.
200 millimeters plievgia en 48 uras
La notg hai per part pluvì anc ina giada 35 millimeters. Ils ultims 3 dis han ils meteorologs mesirà passa 200 millimeters plievgia en tscherts lieus. Quai vul dir, ch'en il Tessin ed en parts da la Svizra Orientala è crudada en trais dis tanta plievgia sco uschiglio en in mais.
Chantun Son Gagl: Pli che 40 acziuns gia la dumengia avantmezdi
La dumengia avantmezdi èn ils pumpiers vegnids clamads gia tar pli che 40 cas d'urgenza en la Val dal Rain. Suenter che la situaziun haja sa stabilisada durant la notg da sonda sin dumengia, haja quai sa midà la dumengia avantmezdi.
Pertutgadas èn oravant tut las vischnancas tranter Thal ed Oberriet, scriva la polizia chantunala da Son Gagl en ina communicaziun. I na dettia dentant nagin privel per la populaziun u per stabiliments.
Appenzell: Situaziun saja sa calmada in zic
Suenter radund 100 cloms d'urgenza la sonda en il chantun Appenzell Dadora para la situaziun dad esser sa calmada in zic. Numerus tschalers e garaschas sajan vegnidas inundadas e vias han stuì vegnir serradas. Auter che la via tranter Lutzenberg e Walzenhausen sajan dentant tuttas puspè avertas, scriva la polizia.
Dal chantun Appenzell Dadens na deva quai naginas infurmaziuns novas da la polizia.
RR novitads 12:00+
Ils meteorologs mesiran la plievgia en sia autezza en millimeters. In millimeter plievgia correspunda ad in liter aua per meter quadrat: 1mm = 1 l / 1 1m2
La metoda pli veglia per mesirar è da tschiffar si ils guts en in recipient. Quella vegn cumplettada oz da radars da precipitaziuns e datas da satellits dad aura.