Ord raschuns tacticas na veglia la polizia betg dar indicaziuns da l’acziun che vegnia fatga actualmain. Divers policists sajan en posiziun enturn il stabiliment da Ringier en il quartier Seefeld a Turitg. Là sa chatta er la redacziun da la gasetta Blick.
Sin sia pagina en la rait rapporta il Blick en in curt artitgel ch'i dettia actualmain «pervi dad ina smanatscha anonima encunter Blick» in'acziun gronda da la polizia en il Seefeld. «Nus essan en contact cun la polizia da la citad» citescha Blick sez il pledader da Ringier, René Beutner, en la rait.
Fertant rapportan autras medias sco la Neue Zürcher Zeitung che la smanatscha cunter la redacziun dal Blick scrivia dad ina «mazzacra en la redacziun». La smanatscha scritta saja er arrivada tar autras chasas da medias, scriva la NZZ sin sia pagina en la rait.
Er cunter la centrala da CH Media en l'Argovia hai dà ina smanatscha seriusa, scriva l'agentura da novitads SDA.
RR novitads 16:00+