La Banca naziunala svizra n'ha anc mai intervegnì uschè ferm sin il martgà da devisas sco quest onn, quai mussan las novas cifras da la SNB.
Dal schaner enfin il zercladur ha la Banca naziunala prendì enta maun 90 milliardas francs per flaivlentar il franc svizzer. Quai è dapli che durant ils davos trais mais. Tenor ils analists mussan questas cifras era il svilup durant la crisa da corona.
Dapi il mars punctuescha la banca ch'ella intervegni pli fitg sin il martgà da devisas. Ella saja sfurzada d'intensivar en il cumbat cunter il ferm franc, cunquai ch'ils investurs tschertgan ella crisa adina pli savens il franc sco investiziun segira. En vista a quai agir da la banca naziunala avevan ils Stadis Unids mess la Svizra l'entschatta dal onn sin ina glista d'observaziun per potenzials manipulaturs da valuta. Il ministeri da finanzas american aveva uschia intimà la banca da publitgar dapli datas davart las transacziuns.
