L'Organisaziun mundiala da la sanadad WHO avertescha da White Snus, in trend che sa derasa pli e pli en l'industria da tubac. Ella crititgescha en spezial che concerns da tubac lavuran intenziunadamain cun gusts dultschs per pledentar surtut persunas giuvnas e gudagnar consumentas e consuments.
Cuntrari a l'UE è la vendita da snus en Svizra dapi il matg 2019 legala. En tut ils pajais da l'UE auter che la Svezia è il snus che cuntegna tubac scumandà.
Purschiders veglian chatschar ina nova generaziun da consuments en la dependenza, scriva l'organisaziun. Perquai che la vendita da cigarettas giaja enavos, schlargiassan concerns da tubac multinaziunals lur paletta da products, per exempel sin cigarettas electronicas u satgets da nicotin.
Dal smetter da fimar al consum supplementar
La WHO cuntradi a la supposiziun che White Snus possia gidar da chalar da fimar. Il cuntrari: Perquai ch'ils satgets pon vegnir consumads praticamain dapertut – er en zonas nua ch'igl è scumandà da fimar – crescha tar blers il consum da nicotin.
Enstagl da chalar da fimar dovran els supplementarmain il snus e cuntinueschan vinavant cun la cigaretta, uschespert ch'igl è lubì.
Sche products da nicotin vesan ora sco dultscharias
Da las persunas en Svizra sur 15 onns consumescha radund mintga quarta almain ina giada il mais in product da nicotin. Quai mussa ina retschertga actuala dals uffizis federals da statistica e da sanadad en collavuraziun cun il fond da prevenziun da tubac.
Cunzunt la moda da consumar saja sa midada – ma era l'exposiziun passiva a fim ed aerosols. Ina gronda part da las persunas dumandadas sustegnia dapli mesiras da protecziun.
Persunas giuvnas vegnan pledantadas da colurs, design, aromas e furmas da consum che sa laschan zuppar dals geniturs.
In quart da las persunas che consumescha regularmain nicotin, consumescha plirs products. Tar ils giuvenils saja quai anc accentuà.
Tenor la retschertga èn cigarettas electronicas ozendi il product principal tar persunas tranter 15 e 17 onns per cumenzar il consum da nicotin. Quai na saja nagina surpraisa, di Monique Portner.
L'industria haja en mira persunas giuvnas. La schanza da vegnir dependent saja numnadamain pli gronda tar persunas sut 18 onns. Perquai che products da nicotin vesan or sumegliant a dultscharias, discurr'ins tar la fundaziun «Dependenza Svizra» d'ina «Candyficaziun».
En connex cun l'industria da tubac e nicotin menziuna era Kevin Meier, coordinatur da prevenziun da dependenza tar l'Uffizi da sanadad Grischun in marketing ferm ed ina schelta da products vasta. Persunas giuvenilas na sajan ozendi betg pli difficilas da proteger dal consum da nicotin – i saja dentant pli cumplex.
Las premissas regulatoricas èn grevas da metter enturn. La lobbi da tubac è ferma e la lescha da tubac en Svizra è anc adina ina da las pli flaivlas en l'Europa.
Ina alternativa presumada sauna
Sin la dumonda davart la percepziun da cigarettas electronicas avisescha Monique Portner sco era Kevin Meier, ch'i na dettia anc nagins studis a lunga vista davart las consequenzas per la sanadad dal consum dad e-cigarettas. Ellas vegnian percepidas savens sco main privlusas e vegnian duvradas per reducir il consum d'auters products da nicotin.
L'effect saja dentant anc ina «black box». Controllas dal labor chantunal da Basilea han almain tar las ingredienzas dad e-cigarettas mussà in purtret problematic: la gronda part dals products testads surpassa limitas e na saja betg confurma a la lescha da tubac e chemicalias.