Alois Vinzens è stà 16 onns a la testa da la Banca chantunala grischuna e surpiglia uss l'uffizi da president tar la Societad per credits d'hotels (SGH). En la societad possia el purtar sia experientscha da la fatschenta da credits. El surpiglia l'uffizi a dal 2023 fin 2027 ed è vegnì elegì dal minister d'economia Guy Parmelin (PPS). Uschia scriva il Departament federal d'economia en ina communicaziun.
Funcziun da la societad
La societad porscha credits per la hotellaria, dentant betg ord motivs da gudogn, ubain per promover la branscha. Ella duai porscher a la hotellaria en regiuns turisticas sustegn. Ils credits vegnan sulettamain concedids a moda subsidiara, en accumpagnament da credits privats.
Sco il Departament federal d'economia scriva, saja il futur da la branscha fitg intschert e l'experientscha da Vinzens preziusa. Vinzens è gia dapi 2013 en l'administraziun da la Societad da credits per hotels e surpiglia per Thomas Bieger che demissiunescha ils 23 da zercladur 2023.
Or da l'archiv
Il 2019 ha Alois Vinzens surdà la batgetta tar la Banca chantunala grischuna.