Siglir tar il cuntegn

Header

video
L'Uniun svizra da musica fa petiziun per dapli libertads d'exercitar
Or da Telesguard dals 27.04.2021.
laschar ir
cuntegn

Societads da musica L'Uniun svizra da musica ha lantschà ina petiziun

Cun «Blasmusik tut keiner Kerze etwas» titulescha l'Uniun svizra da musica ina communicaziun da medias. En quella exprima l'uniun il frust davart las mesiras per musicistas e musicists.

Dapi ils 19 d'avrigl pon musicistas e musicists puspè far musica fin en gruppas da 15. Quai però be cun restricziuns. Senza spartidas sto mintga persuna avair a disposiziun 25 meters quadrat, pia ina distanza da 5 meters tranter mintgina e mintgin.

Tenor l'Uniun svizra da musica na fa quai betg senn, ed en consequenza ha ella lantschà ina petiziun. Bundant 18'000 suttascripziuns èn vegnidas ensemen fin ussa, ch'expriman il frust da musicistas e muscists.

Limitaziuns betg realisticas

Entant che la limita da persunas saja realistica, na valia quai betg per la regla che limitescha il spazi. Quai di Andy Kollegger, il president da l'Uniun da musica chantunala. Tenor el fissan 4 meters quadrat pli realistics.

Vinavant haja l'uniun da musica tema dad in donn dad image. Ils instruments da flad vegnian savens menziunads en connex cun ina ferma derasaziun d'erosols. Quai saja però cuntradictori a studis.

Il donn dad image n'è betg l'unic quità

Andy Kollegger fa era quitads per il futur da las societads da musica. Las musicistas ed ils muscists sajan s'endisads vi da la situaziun actuala – senza provas. Ed i saja grev da puspè motivar tuts e tuttas per turnar en las provas.

Cun la petiziun vulan las musicistas ed ils musicsts però en prima lingia era sa far dudir.

audio
Uniun svizra da musica fa petiziun per dapli libertads d’exercitar
02:58 min, Actualitad dals 27.04.2021.
laschar ir. Durada: 02:58 minutas.

RTR actualitad 17:00

Artitgels legids il pli savens

Scrollar a sanestra Scrollar a dretga