Siglir tar il cuntegn

Header

cuntegn

«Solidaritad cun Rojava» 2000 persunas demonstreschan a Berna

demonstraziun sin via a berna
Legenda: Plirs tschients persunas han demonstrà sonda a Berna cunter ils bumbardaments da l'armada tirca en la Siria. Keystone

Var 2000 persunas han demonstrà a Berna cunter l’intervenziun militara da la Tirchia en la Siria dal nord. Sut il motto «Solidaritad per Rojava» hani mussà solidaritad cun la populaziun en la regiun da cumbat e condemnà l'operaziun militara da la Tirchia – Quai saja in'attatga che cuntrafetschia al dretg internaziunal. Pliras organisaziuns e partidas svizras – tranter autras la PS ed ils Verds – sustegnan las demonstraziuns.

Pretendan dapli engaschi dal Cussegl federal

Plinavant han las persunas pretendì in'offensiva diplomatica dal Cussegl federal, per che las Naziuns unidas possian manar ad in'armistizi immediat en la regiun, ed installar ina zona cun scumonda da sgular. La Svizra duai sper quai sistir il contract da commerzi liber cun la Tirchia, decider sancziuns economicas cunter la Tirchia e bloccar furniziuns d'armas.

Manifestaziun paschaivla

La demonstraziun tras la citad da Berna en direcziun da la plazza federala saja stada paschaivla, rapporta l'agentura da novitads SDA. Mo singulas petardas haja quai dà.

Dapi emnas datti adina puspè manifestaziuns da solidaritad cun ils Curds en la regiun da cumbat.

RR novitads 16:00

Artitgels legids il pli savens