En ils ospitals da l'Alsazia è la situaziun dramatica. La regiun ha pervia da la epidemia dal coronavirus ina gronda mancanza da letgs d'ospital. Adina dapli pazients fermamain malsauns ston perquai vegnir transferids en autras regiuns dal pajais ed er en l'exteriur.
Perquai han uss er ils chantuns Argovia e Genevra surpiglià mintgamai dus pazients da la regiun franzosa. Las persunas sajan sin la staziun intensiva vid apparats da respiraziun, communitgeschan ils chantuns. Gia avant in pèr dis avevan er ils dus chantuns da Basilea ed il Giura prendì si pazients ord l'Alsazia.
Gronda solidaritad en Svizra
Dumandà es uss però er il sustegn e l'agid en Svizra. Uschia è il chantun Argovia er pront da surpigliar pazients dal Tessin. Il servetsch da medi chantunal vegnia ad identifitgar ensemen cun il Tessin pazients e transportar quels en il chantun Argovia.
Er tranter la populaziun è la solidaritad gronda. Tenor il Sonntagsblick s'annunzian en l'entira Svizra voluntaris ch'èn pronts da gidar en ospitals. Quai sajan uschè bleras persunas, ch'ina gronda part na possia gnanc vegnir engaschada.
