Siglir tar il cuntegn

Header

audio
Il virus impedescha inscunters rumantschs en la Bassa
Or da Actualitad dals 02.11.2020.
laschar ir. Durada: 02:57 minutas.
cuntegn

Solitariadad ed isolaziun «Uschia perdan ils giuvens lur stgazi da pleds rumantschs»

Dapi il mars n’han las Rumantschas e Rumantschs giuvens betg pli savì sa participar ad ina da las «scuntradas cumadaivlas» a Turitg, Berna e Basilea. Per il president da la Giuventetgna Rumantscha Uolf Candrian saja quai svilup tut auter che bun.

Ils inscunters per Rumantschas e Rumantschs giuvens en la Bassa – las uschenumnadas «Scuntradas cumadaivlas» – vegnan normalmain organisadas pliras giadas ad onn da la Giuventetgna Rumantscha GiuRu. Pervia da corona n’han quellas dentant betg pli gì lieu. Actualmain tschertga l'associaziun tetgala alternativas per tuttina restar en contact in cun l’auter.

Cultura periclitada

Il president da la Giuventetgna Rumantscha Uolf Candrian declera ch’i saja donn da betg pli pudair far ils inscunters rumantschs. Gist per Rumantschs giuvens en la Bassa sajan las reglas da «Social Distancing» dal Cussegl federal fatalas. Sch’ins na possia betg pli celebrar la cultura ed il linguatg rumantsch tranter ils giuvens lura vegnia grev da mantegnair il liom cun la patria. Las «Scuntradas cumadaivlas» hajan adina mussà ch’i na vegn betg mo discurrì rumantsch cun ils geniturs a chasa mabain ch’i dettia anc blers giuvens che s’interesseschian da duvrar il linguatg publicamain.

Alternativa digitala

Per tuttina pudair mantegnair il contact tranter ils Rumantschs en la Bassa organisescha la Giuventetgna Rumantscha actualmain inscunters ch’èn parzialmain digitals via Zoom. Suenter l'inscunter digital dettia per quels che gughegian, era la pussaivladad da sa scuntrar suenter en ina bar u ustaria. Per il president Uolf Candrian saja cler che quai na saja betg in'alternativa cuntentaivla e tuttina chapeschian blers la situaziun. Cunquai ch’ins vivia actualmain uschia ni uschia mintgadi en ina tscherta isolaziun sajan ins cuntent cun mintga pussaivladad. El ha anc adina speranza ch’ins possia bainbaud puspè organisar scuntradas normalas. Dentant stoppia ins cunzunt ussa emprender da viver cun la situaziun.

RTR actualitad 17:00

Artitgels legids il pli savens

Scrollar a sanestra Scrollar a dretga