Siglir tar il cuntegn

Header

cuntegn

Svizra Sommaruga inspectescha proxim center d'asil federal

Il Zieglerspital a Berna è vid dapi la stad passada. Bainbaud turna però puspè vita en il bajetg: A partir da l’emna proxima avra qua il sisavel center federal per requirents d’asil sias portas. La sonda ha la cussegliera federala Simonetta Sommaruga prendì invista en il center futur.

Il Zieglerspital a Berna vegn a partir da l’emna proxima nizzegià sco center federal per requirents d’asil. La cussegliera federala Simonetta Sommaruga ha visita l’ospital ch’è il mument vid.

La ministra da giustia ha accentuà che dapli che 200 abitantas e abitants da Berna e Köniz vegnan a sa gidar en lavur gratuita per il center per requirents d’asil. L’engaschament voluntari è tenor Sommaruga in’impurtanta premissa per ch’il manaschi funcziuneschia cun success.

Finamira: plaz per 350 persunas

En la chas’auta da letg avra la Confederaziun uss ses sisavel center da recepziun e proceduras. Il manaschi è per il mument limità sin otg onns. En in’emprima fasa duain 150 persunas chattar plaz en l’anteriur ospital, pli tard fin 350.

Il Zieglerspital a Berna.
Legenda: L’ospital era vegnì serrà la stad 2015 en consequenza da la restructuraziun dal segment da sanadad dal chantun Berna. Keystone

Las lavurs necessarias per l’engrondiment èn tenor la Confederaziun terminadas la stad 2017. Fin lura datti in ulteriur albiert d’asil gist dasperas. En il Renferhaus ha plaz 200 persunas.

Suenter la recepziun e la registraziun restan ils requirents d'asil maximalmain 90 dis en il center federal, avant ch’els vegnan eventualmain surdads ad in chantun.

RR novitads 16:00

Artitgels legids il pli savens