Siglir tar il cuntegn

Header

cuntegn

Svizra Son Gagl sa tegna vid Harmos – iniziativa refusada

Il chantun da Son Gagl sa tegna vid l’armonisaziun da la scola populara. Votantas e votants dal chantun han refusà cun stgars 70% in’iniziativa per extrar dal concordat da scola Harmos.

L’iniziativa da l’uniun «Starke Volksschule St. Gallen» è vegnida refusada cun 90’046 cunter 40’240 vuschs. La participaziun a la votaziun munta a 43,4%. In fitg cler resultat mussa la citad da Son Gagl cun 15’270 cun 4’122 vuschs.

PPS sco singula partida per l'iniziativa

La dumonda dal pievel sa drizzava cunter l’introducziun dal plan d’instrucziun 21 e cunzunt cunter l’instrucziun d’ina secunda lingua estra en scola primara. En il cas d’in gea a l’iniziativa fiss Son Gagl stà l’emprim chantun che fiss puspè extrà dal concordat. Ord quai motiv hai dà en l’entira Svizra interess per las votaziuns.

L’iniziativa è vegnida refusada da tuttas partidas auter che da la PPS. La regenza songagliaisa, il cussegl chantunal, l’associaziun chantunala da scolasts ed il sindicat VPOD eran medemamain cunter in’extrada da Harmos.

Medemas schanzas e mobilitad

Il concordat segireschia als uffants medemas schanzas e garanteschia la mobilitad a famiglias, argumenteschan ils aderents. Harmos saja in model cun success, al qual 15 chantuns fetschian part.

Per il comité «Gea a l’extrada da Harmos» munta la decisiun «nagina lubientscha generala per refurmas da scola nuschaivlas.» La regenza stoppia uss tegnair ses pled e posiziunar l’uffant en il center er tar Harmos. Plinavant pretendan ils adversaris che la relaziun tranter scolar e scolast vegnia rinforzada e ch’il persunal d’instrucziun haja libertad areguard las metodas.

RR novitads 15:00

Artitgels legids il pli savens